ՀՀԿ փոխնախագահ Արմեն Աշոտյանը ֆեյսբուքյան իր էջում գրել է. «Ի պատասխան լրատվամիջոցների հարցերին` հայտնում եմ, որ այսօր ՀՀԿ կենտրոնական գրասենյակ է այցելել ՀՔԾ քննիչը՝ առգրավելու համար Հրայր Թովմասյանի ՀՀԿ անդամության կասեցմանը վերաբերող նյութերը»։ Ավելի վաղ հայտնել էինք, որ ԱԺ պատգամավոր Արման Բաբաջանյանի կողմից ՀՀ գլխավոր դատախազին հաղորդում է ներկայացվել մի խումբ պաշտոնատար անձանց կողմից պետական իշխանությունը յուրացնելու առերևույթ հանցագործության դեպքի կապակցությամբ: Հաղորդման հիման վրա ՀՀ հատուկ քննչական ծառայությունում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով քրեական գործ հարուցելու մասին: Հիշեցնենք՝ շաբաթներ առաջ Արման Բաբաջանյանը դիմում էր ներկայացրել գլխավոր դատախազին՝ պնդելով, որ Հրայր Թովմասյանը յուրացրել է ՍԴ նախագահի պաշտոնը՝ կիրառելով հանցավոր սխեմաներ: Ի դեպ, նախնական տեղեկություններով, Հատուկ քննչական ծառայությունը քննչական գործողություններ է իրականացրել ոչ միայն ՀՀԿ կենտրոնական գրասենյակում, այլև՝ Սահմանադրական դատարանում: |