Իրանի արտաքին գործերի նախարարության պաշտոնական ներկայացուցիչ Աբբաս Մուսավին ԱՄՆ նախագահ Դոնալդ Թրամփին կոչ է արել «չխայտառակել» պարսկերենը՝ այդ լեզվով գրառումներ անելով: Այս մասին նա գրել է Twitter միկրոբլոգի իր էջում, հայտնում է Lenta-ն: «Իրանի ժողովրդին սպառնալիքներով, պատժամիջոցներով և ահաբեկչությամբ սպառնող լեզուն և ձեռքերն իրավունք չունեն խայտառակել պարսկերեն հին լեզուն»,- գրել է Մուսավին: Նա նաև հարցրել է՝ ԱՄՆ նախագահն իրո՞ք սատարում է իրանական ժողովրդին, «ում հերոսին նա պարզապես սպանեց»: Մուսավին ի նկատի է ունեցել իրանցի գեներալ Ղասեմ Սուլեյմանիին, ով սպանվեց Իրաքում ԱՄՆ հատուկ գործողության ժամանակ: «Դիմում եմ Իրանի քաջ և տառապյալ ժողովրդին, նախագահությանս սկզբից ես ձեր կողքին եմ եղել և իմ վարչակազմը կշարունակի ձեր կողքին մնալ»,- գրել է Թրամփը: |