Ազգային ժողովի փոխնախագահ Լենա Նազարյանն այսօր «Առաջին լրատվական»-ի եթերում հայտնել է, որ Սահմանադրական դատարանի ճգնաժամի հանգուցալուծման նոր տարբերակը դեռ չի հասել Ազգային ժողով, բայց քննարկումներ տեղի են ունենում «Իմ քայլ»-ում և կառավարությունում: «Առաջարկվում է, որ հեռանան այն դատավորները, որոնք արդեն 12 տարի պաշտոնավարել են, և ՍԴ նոր նախագահ ընտրվի… Մենք ամեն ինչ արել ենք իրավական ճանապարհով առաջնորդվելու համար»,- ասել է Նազարյանը: Հարցին, թե Հրայր Թովմասյանը կարո՞ղ է նորից առաջադրվել, Նազարյանը պատասխանել է. «Կարող է առաջադրվել, բայց զրոյական շանսեր ունի»: Նա հայտնել է, որ ԱԺ-ում մյուս տարի լինելու է դատախազի հաշվետվությունը՝ ենթադրաբար ապօրինի գույքի հետ կապված գործերի քննության վերաբերյալ, ստեղծվելու է հակակոռուպցիոն կոմիտե՝ անհրաժեշտ գործիքակազմով և մասնագիտացված աշխատակազմով, որտեղ կենտրոնանալու են հակակոռուպցիոն գործերի քննությունները: «Արդարադատության նախարարը կառավարության զեկույցի ներկայացման ժամանակ խոսեց նաև անցումային արդարադատության մասին, շուտով ԱԺ կբերվի Փաստահավաք հանձնաժողովի կազմավորման կարգի և գործունեության մասին օրենքը, կստեղծվի հանձնաժողով, որը կքննի մի քանի կարևոր հարցեր՝ կեղծված ընտրությունների, քաղաքական հետապնդումների, ոչ մարտական պայմաներում զոհված զինծառայողների դեպքերի և ունեզրկումների հարցերը: Պատկերացրեք, թե ինչ խմորումներ են լինելու, մենք ուղղակի եռալու ենք այս ամենի մեջ, որովհետև տարբեր շահերի բախումներ են առաջանալու»,- ասել է նա: Մանրամասները՝ սկզբնաղբյուրում: |