ԱՄՆ նախագահ Ջո Բայդենի թիմի անդամները բազմիցս փորձել են ճեպազրույցներից առաջ տեղեկանալ, թե Սպիտակ տանը հավատարմագրված թղթակիցներն ինչ հարցեր են մտադիր բարձրաձայնել: Նման տեղեկատվությամբ հանդես է եկել The Daily Beast տեղեկատվական պորտալը։
Աղբյուրների տեղեկություններով՝ ԱՄՆ-ի նախագահի վարչակազմի հաղորդակցությունների բաժնի աշխատակիցները փորձեր են ձեռնարկել՝ պարզելու, թե ինչ հարցեր են նրանք մտադիր տալ Սպիտակ տան մամուլի քարտուղար Ջեն Փսաքիին:
Ինչպես նշում է պորտալը, այդ հարցումները մտահոգություն են առաջացրել լրագրողական կորպուսի թղթակիցների շրջանում:
«Թեև հաճելի է, որ ճեպազրույցները վերսկսվում են, սակայն մամուլը չի կարող իր աշխատանքը կատարել, եթե Սպիտակ տունը առանձնացնում և ընտրում Է այն հարցերը, որոնք իրեն անհրաժեշտ են»,- պորտալը մեջբերել է լրագրողներից մեկի խոսքը:
Ընդ որում՝ Բայդենի մամուլի ծառայությունում չեն հերքել այդ տեղեկությունը՝ նշելով, որ այդպիսով փորձել են կարգավորել հարաբերությունները մամուլի հետ։
«Մեր նպատակն է ամենօրյա ճեպազրույցն առավելագույնս օգտակար և տեղեկատվական դարձնել՝ ինչպես լրագրողների, այնպես էլ հանրության համար: Այդ նպատակին հասնելը մասամբ նշանակում է թղթակիցների հետ կանոնավոր փոխգործակցություն՝ հասկանալու համար, թե Սպիտակ տունն ինչպես կարող Է առավել օգտակար լինել նրանց՝ անհրաժեշտ տեղեկատվություն տրամադրելու հարցում»,- հայտարարել է Սպիտակ տան ներկայացուցիչը։