«Հայրենիքի փրկության շարժման» անդամներն ու նրանց համախոհները, ովքեր պահանջում են վարչապետ Փաշինյանի հրաժարականը, այժմ Կառավարական ամառանոցի մոտ են: Տարածքում ելույթների ժամանակ շարժման մասնակիցները հակադարձեցին Փաշինյանի՝ երեկվա խոսքերին՝ հայտարարելով, որ թավիշը վաղուց է վերացել: «Քո միակ գործիքը սպառնալիքն է, Նիկո՛լ, մենք բոլորս դա լավ տեսնում ենք, բայց սպառնալու արդյունքում դու մնացել ես մենակ: Էսօր քեզ մերժում է մեր ժողովուրդը, մերժում է նույնիսկ երկրի միակ հենքը՝ բանակը, քեզ մերժում է Հայ Առաքելական եկեղեցին, որ քեզ չեն թողնում նույնիսկ պատարագի մասնակցես: Նիկո՛լ, Էրդողանից բացի քեզ մերժում են բոլորը: Քեզ մերժում է նույնիսկ քո կողմից կիրթ անվանված Ալիևը, բայց ինքը դրա մասին չի ասում, որովհետև դու նվեր ես Ադրբեջանի համար»,- հայտարարեց «Հայրենիք» կուսակցության անդամ Բաբկեն Հարությունյանը: Հավելենք, որ ամառանոցի տարածքն ու շրջակայքը հսկում են մեծ թվով ոստիկանական ուժեր: |