«Ադրբեջանի նախագահը ևս մեկ անգամ ցույց տվեց աշխարհին, որ ինքը պատրաստվում է պետական մակարդակով շարունակել քարոզել ատելություն»,- այսօր՝ լրագրողների հետ զրույցում հայտարարեց «Իմ քայլը» խմբակցության պատգամավոր Տաթևիկ Հայրապետյանը:

Դիտարկմանը, թե իշխանության որոշ ներկայացուցիչներ հարմարվողականության քաղաքականություն են վարում, Հայրապետյանն ասաց․ «ՀՀ-ում մեր արտաքին քաղաքականության հիմնական շեշտադրումները կատարվում են վարչապետի և ԱԳ նախարարի կողմից։ Վարչապետը խոսել է հակամարտության լուծված չլինելու մասին, քանի որ չկա կարգավիճակի հարց։ Վերջերս ռուսական ԶԼՄ-ներին տված հարցազրույցում խոսել է այն մասին, որ մենք տարածաշրջանում երբեք թշնամիներ չենք փնտրել՝ ի տարբերություն Թուրքիայի և Ադրբեջանի։ ԱԳ նախարարը նույնպես կարևոր շեշտադրումներ է արել։ Մինչ այդ նախ խոսել է Շուշիի և Հադրութի օկուպացիայի մասին, և որ մեզ համար դրանք հետագա բանակցային գործողությունների թեմա են»,- ասաց պատգամավորը։

Հայրապետյանի խոսքով՝ ասել, որ իշխանությունը հրաժարվում է վերականգնել նախկին ԼՂԻՄ սահմանները, դուրս է իրականությունից։