Բնապահպան Լևոն Գալստյանը ֆեյսբուքյան իր էջում գրել է. «Այս խառը ժամանակներում հանքահենները պարապ չեն նստում ու տարբեր խուճուճ անուններով ընկերություններ են ծնում և դիմում հանքերի երկրաբանական ուսումնասիրություններ անելու թույլտվություններ ստանալու համար։ Այս 2 ընկերություններն ստեղծվել են 2021-ի փետրվարին ու մեկ ամսվա տարբերությամբ հերթով դիմել են Լոռու մարզի Լոռու բերդի համայնքապետարան՝ Ուռուտ գյուղի տարածքում այդ աշխատանքների սկսման համար նախնական համաձայնություններ ստանալու համար։ Որքան հասկացա, առաջինի («ՆԵՅՉՐԼ ՌԻՍՈՐՍԻԶ» ՍՊԸ) դեպքում ինչ-ինչ ընթացակարգային խախտումներ են արել երևի ու հիմա այլ ընկերության («ՋԻՆ ՀՈԼԴԻՆԳ ԼԻՄԻԹԻԴ» ՍՊԸ) անունով են դիմել նույն բանի համար:

Տեսնես՝ ո՞վ կամ ովքե՞ր են այս բոլորի համակարգողները ՀՀ կառավարությունում, որոնք կրկնում են նախկինների ձախողված փորձն ու հույսերը դրել են նորելուկ ընկերությունների միջոցով ընդերքի բռնազավթման վրա։ Վերջին 2 ամսվա ընթացքում արդեն այսպիսի 4-5 հայտ է ներկայացվել միայն Լոռու մարզում և մեկ հատ էլ Վայոց ձորի Գլաձոր համայնքում»։