Իրավաբանական գիտությունների թեկնածու Վահե Թորոսյանը ֆեյսբուքյան իր էջում գրել է. «Դպրոցական ավարտական փաստաթղթերը՝ ատեստատները այսուհետ կդառնան թվային և կունենան այս տեսքը։ Իրավական ակտերի նախագծերի հարթակում արդեն իսկ դրվել է հրամանի փոփոխված նախագիծը։
Նկատեք, որ դեռ նախորդ տարի համավարակի պատրվակի ներքո արդեն իսկ թվայնացվել էր հանրակրթության զգալի թվով փաստաթղթեր այդ թվում՝ էլեկտրոնային դասամատյանները, աշխատողի և սովորողի անձնական էլեկտրոնային գործերը, էլեկտրոնային հաստիքացուցակները, առարկաների էլեկտրոնային թեմատիկ պլանները, ուսումնադաստիարակչական աշխատանքների էլեկտրոնային տարեկան պլանը, էլեկտրոնային աշխատանքային պլանները:
Մի նախաձեռնություն ևս քննարկվում է, որի համաձայն աշակերտը ծնողի գրավոր համաձայնությամբ կարող է հրաժարվել թղթային դասագրքից և այն փոխարինել դրա էլեկտրոնային տարբերակով։ Այս չարիքի հետևանքները պատկերացնել կարծում եմ դժվար չէ։
Այս կերպ քայլ առ քայլ կազմալուծվում է Դպրոցը՝ վերածվելով թվային համակենտրոնացման ճամբարի։
Նրանք սա հիմավորում են իբրև թե վարչարարության նվազեցման և կառավարման արդյունավետության տեսանկյունից, բայց իրականում պարարտ հող է նախապատրաստվում Հեռավար կրթության արմատավորման և ապասոցիալական անհատ ձուլելու համար»: