ՄԱՄՈՒԼ.ամ
Hay / Հայ | Рус | Eng | Tür
USD 454.86, EUR 478.29, RUB 7.18, GBP 567.07
+17 °C, +11 °C ... +23 °C Վաղը`+25 °C
«Փետրվարի 1-ից կթանկանա էլեկտրաէներգիան, ջուրն արդեն թանկացել է, իսկ ապրիլի 1-ից՝ բնական գազը»․ Ն․ Զոհրաբյան
14:15, 16.01.2022 | mamul.am
3991 | 5

ԱԺ նախկին պատգամավոր Նաիրա Զոհրաբյանի գրառումը. «Շնորհավորում եմ գազի, ջրի և էլեկտրաէներգիայի զգալի թանկացման առթիվ
Երբ մինչհեղափոխական Հայաստանում փորձ արեցին մարշրուտկայի երթևեկության գինը 50 դրամով բարձրացնել, երևանյան փաբերի 200 դրամանոց պիվայի կոնտիգենտ «մտավորականությունն» ու արևմտյան գրանտային սեգմենտը սկսեցին 100 դրամների ազգային-ազատագրական շարժումը, որը պսակվեց ապստամբ հեղափոխականների հաղթանակով՝ մարշրուտկայով երթևեկելու գինը մնաց 100 դրամ ու առ այսօր մարդիկ, ֆիտոֆտորոզի հանդեպ կայուն իմունիտետ ունեցող «Ավրորա» տեսակի կարտոֆիլի նման, իրար վրա բարձված շարունակում են երթևեկել։
Եվ ահա լավ լուր՝ պաշտոնապես 33, իսկ իրականում մոտ 60 տոկոս աղքատություն ունեցող Հայաստանի հանրապետության քաղաքացիների համար։ Փետրվարի 1-ից կթանկանա էլեկտրաէներգիան, ջուրը արդեն թանկացել է, իսկ ապրիլի 1-ից կթանկանա նաև բնական գազը։
Բնական գազի սակագնի հաշվարկման այնպիսի բարդ մեթոդաբանություն են հորինել, որ անգամ մաթտրամաբանության անլուծելի խնդիր լուծած Վահան Քերոբյանը դժվար հասկանա, սակայն փորձենք հատկապես ընտանեկան նպաստից և սոցիալական այլ աջակցություններից օգտվող սեգմենտին բացատրել ապրիլի 1-ից իրեն սպասվող սյուրպրիզը։
Իհարկե, իրենցից շատերը կասեն՝ «սաղ Սերժն ա մեղավոր», «նախկինները բերեցին՝ թանկացումները քցեցին էս հարիֆի գրպանը», իսկ առավել սուբլիմացված առանձնյակները կգոռան՝ «տարել են «Գազպրոմի» պադվալում գլխին մաուզեր են պահել», այդուհանդերձ, տեղեկացնեմ, որ ապրիլի 1-ից սահմանի վրա ռուսական գազի գինը կլինի 173,3 ԱՄՆ դոլար, այսինքն՝ ներկրվող գազի գինը կավելանա 8,3 ԱՄՆ դոլարով՝ կամ 5 տոկոսով, ընտանեկան կամ սոցիալական նպաստի իրավունք ունեցող սպառողների համար (տարեկան մինչև 600 խորանարդ) բնական գազի սակագինը 1 խմի հաշվով կկազմի 133,1 ՀՀ դրամով, այսինքն՝ կավելանա 33,1 տոկոսով կամ 33.1 ՀՀ դրամով, ջերմոցային տնտեսությունների համար բնական գազի սակագինը 1000 խմ հաշվով կկազմի 277,3 ԱՄՆ դոլար, այսինքն՝ կավելանա 23,8 տոկոսով կամ 53.3 ԱՄՆ դոլարով, վերամշակող կազմակերպությունների համար բնական գազի սակագինը 1000 խմ հաշվով կկազմի 277,3 ԱՄՆ դոլար, այսինքն՝ կավելանա 23,8 տոկոսով կամ 53.3 ԱՄՆ դոլարով և այսպես շարունակ։
Դե, չբացատրեմ, թե գազի և էլեկտրաէներգիայի թանկացումը ինչ կարգի գնաճի է բերելու։ Դա պատկերացնելու համար մաթտրամաբանություն պետք չի։
Բայց, չգիտես ինչի, էս ամենից տրամադրությունս մի տեսակ հեչ չի ընկնում։
Երևի այն պատճառով, որ այն, ինչ տեղի է ունենում և դեռ տեղի է ունենալու՝ արդար է ու որովհետև այս իշխանությունն ամենարդար բանն էր, որ պիտի տեղի ունենար մեզ հետ»։

Կիսվի՛ր այս նյութով՝
| |
դեպի վեր