Ճապոնիայի արտաքին գործերի նախարարությունը «Դիվանագիտության կապույտ գրքում» 19 տարվա մեջ առաջին անգամ «հյուսիսային տարածքները» (այդպես է Տոկիոն անվանում Հարավային Կուրիլյան կղզիները) անվանել է «օկուպացված», հայտնում է NHK հեռուստաալիքը։ Ճապոնիայի ԱԳՆ-ը դատապարտել է Ուկրաինայում ռուսական ռազմական գործողությունը և նշել, որ այս ֆոնին դժվար է խոսել Ռուսաստանի հետ խաղաղության պայմանագրի շուրջ բանակցությունների հեռանկարների մասին։ Գերատեսչության զեկույցում նշվում է, որ «հյուսիսային տարածքները Ճապոնիայի անբաժանելի մասն են, սակայն ներկայում անօրինական կերպով օկուպացված են Ռուսաստանի կողմից»։ Մոսկվան և Տոկիոն չեն կարողանում խաղաղության պայմանագիր ստորագրել Երկրորդ համաշխարհային պատերազմից հետո՝ Հարավային Կուրիլյան կղզիների տարածքային վեճի պատճառով: Ճապոնիան Իտուրուպը, Կունաշիրը, Շիկոտանը և Հաբոմայ կղզիների խումբը համարում է իր «հյուսիսային տարածքները»: Մոսկվան դա չի ընդունում: |