Կենսաթոշակային բարեփոխումների դեմ տարեսկզբից ի վեր արդեն ութերորդ ցույցն է սկսվել Փարիզում: Օրինագիծը քննարկման վերջնական փուլում է Ֆրանսիայի խորհրդարանի ստորին պալատում:
Ակցիային հավաքվել է մի քանի տասնյակ հազար մարդ։ Ցուցարարների շարասյունը՝ Ֆրանսիայի բոլոր առաջատար արհմիությունների դրոշների ներքո, երթով կշարժվի Հաշմանդամների պալատի մոտ գտնվող էսպլանադից մինչև Իտալիայի հրապարակ:
Ցուցարարների շարքերում կան բազմաթիվ երիտասարդներ ու հակակապիտալիստական ​​շարժման ու «դեղին բաճկոնների» ներկայացուցիչներ։ Մասնակիցները վանկարկում են «Մենք կարող ենք հաղթել», «Աշխատողները ուժ ունեն», «Թոշակ 60 տարեկանում» կարգախոսները։ Մասնակիցների պաստառների վրա կարող ենք կարդալ՝ «Փող՝ աշխատավարձերի և թոշակների համար, և ոչ թե պատերազմի կամ բաժնետերերի գրպանում», «Կեցցեն փարիզյան աղբահանները», «Մակրոնն ու Բորնը արհամարհում են ֆրանսիական ժողովրդավարությունը», «Բարձրացրե՛ք կենսաթոշակները, ոչ թե կենսաթոշակային տարիքը»:
Ցուցարարների հիմնական պահանջն է նվազեցնել կենսաթոշակային տարիքը մինչև 60 տարի։ Ֆրանսիացիները թերահավատորեն են վերաբերում բարեփոխումների անհրաժեշտության վերաբերյալ իշխանությունների բացատրություններին, այն է՝ կենսաթոշակների վճարման համար բյուջետային միջոցների բացակայությունը։ Նրանք համոզված են, որ Ֆրանսիան պետք է ավելի արդար բաշխի հարստությունը և հարկ սահմանի կորպորատիվ ավելցուկային շահույթի վրա, ինչպես նաև դադարեցնի ռազմական բյուջեի ավելացումը։