Հյուսիսատլանտյան դաշինքը 2024 թվականին կանցկացնի իր պատմության մեջ ամենախոշոր զորավարժությունները սառը պատերազմից հետո, ասել է ՆԱՏՕ-ի ռազմական կոմիտեի ղեկավար, ծովակալ Ռոբ Բաուերը Օսլոյում ՆԱՏՕ-ի գլխավոր շտաբների պետերի տարեկան համաժողովի շրջանակներում։ Ռազմական կոմիտեի ղեկավարի խոսքով՝ դաշինքը «սպասում է հավաքական պաշտպանության նոր դարաշրջանի»։ «Մենք երբեք ավելի ուժեղ և ավելի պատրաստված չենք եղել»,- ընդգծել է Բաուերը։ «Անսասան պաշտպան» զորավարժությունները, որոնց ընթացքում իրականացվում է կոլեկտիվ պաշտպանություն, պարբերաբար տեղի են ունենում: Վերջին անգամ զորավարժությունները տեղի են ունեցել 2021 թվականին, երբ դրանց մասնակցել են ավելի քան 9 հազար զինվորականներ ՆԱՏՕ-ի ավելի քան 20 երկրներից և գործընկերներից։ Այն մասին, որ ՆԱՏՕ-ն պատրաստվում է անցկացնել Սառը պատերազմից ի վեր իր ամենախոշոր զորավարժությունները, սեպտեմբերի 10-ին հայտնել է The Financial Times (FT) թերթը՝ հղում անելով դաշինքի պաշտոնյաներին։ Սպասվում է, որ զորավարժությունները կներառեն 500-ից 700 մարտական ինքնաթիռ և ավելի քան 50 նավ, հայտնել են թերթի աղբյուրները։ Զորավարժություններին ընդհանուր առմամբ կմասնակցի 32 երկիր, այդ թվում՝ Շվեդիան, որի հայտը ՆԱՏՕ-ին անդամակցելու վերաբերյալ դեռևս չի վավերացվել Թուրքիայի և Հունգարիայի կողմից։ |