Օրեր առաջ Հայաստանի պատմության թանգարանում բացվել է «Կարասի ֆենոմենը թաղման ծեսում. կարասային թաղումների մշակույթն անտիկ Հայաստանում» խորագրով ժամանակավոր ցուցադրություն, որը կազմակերպվել է Հայաստանի պատմության թանգարանի և ՀՀ ԳԱԱ ՀԱԻ / Institute of Archaeology & Ethnography-ի համագործակցությամբ։
Ցուցահանդեսում ներկայացված են Հայաստանի տարբեր հնավայրերի (Գառնի, Նոր Արմավիր, Մեծամոր, Ներքին Նավեր, Մաստարա և այլն) պեղումներից և պատահաբար հայտնաբերված թաղման կարասներն իրենց ուղեկցող գույքով՝ խեցեղեն, մետաղ, զարդեր և այլ իրեր։
Հատկապես ուշագրավ է կարասային իրական թաղման փոքրիկ վերարտադրությունը, ինչը այցելուներին թույլ է տալիս պատկերացնել, թե ինչպես է տեղի ունեցալ թաղման յուրահատուկ այս ձևը։
Հայաստանի, Արցախի և Նախիջևանի տարածքում բացահայտվել է կարասային թաղումների մոտ 350 օրինակ։
Ցուցադրության բացման շրջանակում Հնագիտության և ազգագրության ինստիտուտի կողմից Հայաստանի պատմության թանգարանին նվիրվել է մեծ կարաս, որը համալրել է թանգարանի 400․000-անոց ֆոնդը։