Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը Radiofrance ռադիոկայանին տված հարցազրույցում ասել է, որ Ադրբեջանը չի նախատեսում նոր պատերազմ սկսել Հայաստանի դեմ և կոչ է արել վերսկսել բանակցությունները՝ խաղաղության հասնելու համար։
«Իհարկե, եթե Հայաստանը հարձակվի մեզ վրա, մենք ձեռքերը ծալած չենք նստի։ Մենք պետք է վերադառնանք բանակցությունների ուղի... Եթե Հայաստանը միանա խաղաղության և կայունության հաստատման մեր ջանքերին, մենք լիովին պատրաստ ենք նպաստելու։ Շառլ Միշելը լավ աշխատանք է կատարել` որպես Եվրոպական խորհրդի նախագահ՝ նպաստելով բանակցությունների վերսկսմանը։ Մենք կրկին պատրաստ ենք Եվրոմիության հետ եռակողմ ձևաչափով բանակցություններին»,- ասել է Ամիրբեկովը։

Նա նաև ընդգծել է «Ադրբեջանի հարգանքը» Հայաստանի և այլ երկրների տարածքային ամբողջականության նկատմամբ. «Մենք վերջ կտանք այս թշնամությանը... Հայաստանի հայտարարությունները, թե Ադրբեջանը պատրաստվում է նոր պատերազմի, լիովին անհիմն են։ Մենք հարգում ենք Հայաստանի տարածքային ամբողջականությունը, ինչպես աշխարհի մյուս բոլոր երկրներինը»։