Իրավապաշտպան Վարդան Հարությունյանի ֆեյսբուքյան գրառումը. «Ալիևը Արևմուտք գնալ չի ցանկանում։ Նա ամեն ինչ անում է, որ հայ-ադրբեջանական բանակցությունները Արևմուտքից հեռու ու առանց Արևմուտքի մասնակցության կայանան։ Նրա համար նախընտրելին Մոսկվայի միջնորդությունն է ու Պուտինն է։
Նա իրավունքի հետ կապված խնդիրներ ունի, իսկ Արևմուտքը խոսում է իրավունքից։ Նա իր հաջողությամբ ոգևորված պարտադրանքների լեզվով է ցանկանում խոսել, իսկ Արևմուտքում խոսում են իրավունքից։ Շոլցի, Մակրոնի, Միշելի ներկայությամբ նրա գործը դժվարանում է։ Այդ միջավայրում նա իրեն մենակ ու օտար է զգում։ Ցանկանում է հանդիպել այնպիսի հարթակներում, որտեղ Արևմուտքը չկա և իրավունքը չկա։ Այս պատճառով էլ Գրանադա չգնաց։
Հայաստանն, իհարկե, հանդիպումներից չպետք է հրաժարվի։ Հանդիպումներն ու առարկայական զրույցը մեր շահերից են բխում։ Խաղաղությանն ուղղված ցանկացած քայլ մեր շահերից է բխում։ Բայց այդ հանդիպումներում իրավունքը պետք է լինի։ Պայմանավորվածությունները պետք է բխեն միջազգային իրավունքից։
Հետևաբար, ամեն ինչ պետք է անել, որ հոկտեմբերին նախատեսված բրյուսելյան հանդիպումը կայանա»: