Ուկրաինայի զինված ուժերի գլխավոր հրամանատար, գեներալ Վալերի Զալուժնին հարցազրույց է տվել The Economist ամսագրին, որտեղ խոսել է Ուկրաինայի և Ռուսաստանի դիմակայության նոր մակարդակի անցման մասին: Զալուժնիի խոսքով՝ Ռուսաստանի լայնամասշտաբ ներխուժման սկզբից Ուկրաինան կարողացել է ոչ միայն կանգնեցնել հակառակորդի առաջխաղացումը, այլև ազատագրել կորցրած տարածքի զգալի մասը: Սակայն այժմ հակամարտությունը թևակոխում է նոր փուլ՝ «դիրքային» պատերազմ, որը մեծ ռիսկեր է պարունակում Ուկրաինայի զինված ուժերի և պետության համար. «Պատերազմում հաղթելու համար Ուկրաինային զենք է պետք, ամեն ինչ՝ սկսած օդում առավելությունից և ռադիոէլեկտրոնային պայքարի միջոցների բարելավումից մինչև հակահրթիռային պայքարի մակարդակի բարձրացում և ականազերծման նոր տեխնոլոգիաներ»,- ասել է նա: