Հասարակական գործիչ Կարեն Հեքիմյանի գրառումը․ «Տեր-Պետրոսյան Լևոնը բազմիցս ասել է` «Ղարաբաղի հարցի լուծման բանալին գտնվում է Ռուսաստանի ձեռքում»: Ճիշտ է ասել Տեր-Պետրոսյան Լևոնը, սակայն մինչև վերջ չի ասել:
Ղարաբաղի հարցի լուծումը կախված է երկու հանգամանքից`
1. Ռուսաստանի հանդեպ հավատարմությունից,
2. Տվյալ ժամանակահատվածում ՆԱՏՕ-ի և Թուրքիայի փոխհարաբերություններից:
Ըստ այդմ, եթե Հայաստանը Ռուսաստանին հավատարիմ է, իսկ Թուրքիայի և ՆԱՏՕ-ի հարաբերությունները հարթ են, Ղարաբաղի հարցը «սառեցվում է» Հայաստանի օգտին: Կա նաև հակառակ տարբերակը: Հայաստանի` Ռուսաստանի հանդեպ անգամ հարյուրապատիկ ավելի հավատարմության դրսևորման, սակայն Թուրքիայի և ՆԱՏՕ-ի հարաբերությունների անհարթության դեպքում, Ղարաբաղի հարցը «լուծվում է» Ադրբեջանի օգտին: Այլ կերպ ասած, Ղարաբաղի հարցի լուծման ռուսական բանալին, անկախ Ռուսաստանի հանդեպ հավատարմության դրսևորման աստիճանից, կախված է թուրքական կախիչից:
Ստացվում է, որ`
1. Կամ Հայաստանը պետք է անվերջ հավատարիմ մնա Ռուսաստանին և հետևի Թուրքիա-ՆԱՏՕ փոխհարաբերություններին,
2. Կամ վերջնականապես դուրս գա Ռուսաստանի ազդեցությունից և Ղարաբաղի հարցը փորձի լուծել միջազգային իրավունքի հարթությունում, միջազգային բանալիի օգնությամբ:
Առաջին դեպքում, Հայաստանն այլ պետությունների քաղաքական շահերի սպասարկման համար անվերջ զոհեր կտա: Ավելին` թուրքական կախիչից կախված ռուսական բանալին օրերից մի օր կփակի նաև Հայաստանի պետականությունը:
Այսինքն, ողջամիտ է երկրորդ տարբերակը: Ըստ այդմ, առերևույթ Փաշինյան Նիկոլի` Ռուսաստանի ազդեցությունից ձերբազատվելուն միտված քայլերը ճիշտ են, սակայն...
Արդյո՞ք ազնիվ մարդ է Փաշինյան Նիկոլը և արդյո՞ք արժի վստահել իրեն: Կարծում եմ` հայ հասարակությունը կպատասխանի այդ հարցերին հնարավորինս արագ, քանզի
ինչպես ասում էր դասականը` «սառույցը շարժվել է, պարոնայք երդվյալ ատենակալներ» և Հայաստանին անհրաժեշտ է «զորահանդեսի հրամանատար»»։