Փաստաբան Արսեն Բաբայանը տեսակցել է «Իմնեմնիմի» փոդքասթի` օրերս կալանավորված հաղորդավար Վազգեն Սաղաթելյանին և փոխանցել նրա խոսքերը:

«Վազգեն Սաղաթելյանի մոտ էի: Շատ լավ է, տրամադրությունը՝ բարձր: Վազգենը ողջունում է բոլորիդ, մեծ շնորհակալություն հայտնում աջակցության համար: Խնդրեց ձեզ փոխանցել․ «Տեղյակ եմ, որ շատ-շատ մարդիկ անդադար ռեժիմով հետաքրքրվում են իմ մասին: Ինձ զգում եմ հրաշալի: Տրամադրությունս բարձր է ու մարտական: Եկել եմ բանտ, որ անձամբ ծանոթանամ Նիկոլի ապագա կացարանի պայմաններին»:
«Իմնեմնիմի» ընտանիքի անդամներին ուղղված ուղերձը խնդրել է, որ հրապարակեմ հենց փոդքաստի ընթացքում, ինչն էլ կանեմ մոտ ապագայում:

Երբ Վազգենին հարցրեցի, թե ո՞նց են պայմանները քրեակատարողականում, նա պատասխանեց՝ «Համարյա Եգիպտոսի նման... էստեղ էլ ա «լյոքշ», էստեղ էլ խորհուրդ չի տրվում լքել հանգստյան տան տարածքը, սնունդը ներառված ա փաթեթում, բայց էնքան էլ լավը չի, սպասարկող անձնակազմը շատ է ու բոլորը՝ նույն շորերով»։