Հայաստան-Եվրոմիություն-ԱՄՆ ձևաչափով բարձր մակարդակի հանդիպման առանցքը խաղաղության գործընթացը չի լինի: Այս մասին ճեպազրույցի ժամանակ ասել է ԱՄՆ Պետքարտուղարության խոսնակ Մեթյու Միլլերը։

Նա, մասնավորապես, նշել է. «Մեր հանդիպման ընթացքում կքննարկվեն Հայաստանի տնտեսական դիվերսիֆիկացիայի, մարդասիրական օգնության, փախստականներին և Հայաստանի քաղաքական բարեփոխումներին աջակցության հարցերը»։

Հիշեցնենք, որ ավելի վաղ նման հայտարարությամբ էր հանդես եկել ԵՄ արտաքին գործերի և անվտանգության քաղաքականության հարցերով խոսնակ Փիթեր Սթանոն:

«Ճիշտ չէ, որ նիստը նվիրված է լինելու անվտանգության երաշխիքներին։ Այն չի անդրադառնա այլ հարցերի, բացի ԵՄ-ԱՄՆ-Հայաստան հարաբերություններից։

Այսինքն՝ Հայաստանի և Ադրբեջանի միջև հարաբերությունների կարգավորման և խաղաղ բանակցությունների հարցերը չեն քննարկվի:

Հիմնական ուշադրությունը կենտրոնանալու է Հայաստանի տնտեսության կայունության և այդ երկրի հետ երկկողմ համագործակցության վրա»,- ասել էր նա:

Հիշեցնենք, որ ապրիլի 5-ին տեղի կունենա Հայաստան-Եվրոմիություն-ԱՄՆ ձևաչափով բարձր մակարդակի հանդիպում։