Ռուսաստանը Ղազախստանին խնդրել է «պատրաստ լինել 100 հազար տոննա բենզին մատակարարել իրեն ուկրաինական անօդաչու թռչող սարքերի հարձակումների և ծառայության ընդհատումների պատճառով դեֆիցիտի դեպքում»: Այս մասին հայտնում է Reuters-ը։ Լրատվականի աղբյուրներից մեկն ասել է, որ Ռուսաստանի համար պաշարներն օգտագործելու գործարքն արդեն համաձայնեցված է։ Աղբյուրների համաձայն՝ Մոսկվան Ղազախստանին խնդրել է 100 հազար տոննա բենզինի վթարային պաշար ստեղծել՝ պատրաստ Ռուսաստան առաքելու համար։

Ղազախստանի և Ռուսաստանի էներգետիկայի նախարարությունների ներկայացուցիչներն այս հարցում որևէ մեկնաբանություն չեն տվել, նշում է Reuters-ը։

Երկրի ներսում վառելիքի պակասը կանխելու համար Ռուսաստանը մարտի 1-ից վեց ամսով արգելք է դրել բենզինի արտահանման վրա, սակայն այդ արգելքը չի տարածվում ԵԱՏՄ-ի գործընկերների, ինչպես նաև այն երկրների վրա, որոնց հետ կնքվել են միջկառավարական համաձայնագրեր։

Սակայն, ըստ առևտրականների, եթե իրավիճակը վատթարանա, ապա արգելքը կարող է ընդլայնվել։ Այսպես, Reuters-ի աղբյուրներից մեկի համաձայն, «մայիսին Ռուսաստանը կարող է բավարար բենզին չունենալ ներքին շուկայի համար, ուստի կա արտահանումը նույնիսկ ԵԱՏՄ-ի ներսում կասեցնելու վտանգ»։

Դեֆիցիտի պատճառ է դարձել բենզինի արդյունահանման կրճատումը Ռուսաստանում նավթավերամշակման գործարաններին ուկրաինական անօդաչու թռչող սարքերի մի քանի հաջող հարվածներից հետո: Մարտի երեք շաբաթվա ընթացքում ռուսական նավթավերամշակման գործարանները 10%-ով կրճատել են շարժիչային վառելիքի արտադրության ծավալները։ Օրսկ քաղաքի մեկ այլ նավթավերամշակման գործարան ապրիլի 7-ին ջրհեղեղի պատճառով դադարեցրել է արտադրությունը։