ԱԺ նախկին նախագահ, քաղաքագիտության դոկտոր Տիգրան Թորոսյանը Livenews-ի եթերում անդրադարձել է Հայաստանում ստեղծված իրավիճակին, խոսել լուծման ուղիների մասին․ «Ցանկացած պարագայում լուծում կա։ Քաղաքական գործընթացների առանցքային դերակատարները կուսակցություններն են։ Հայաստանում արդեն տարիներ է, ինչ ավանդույթ է դառնում, երբ հայտարարում են, թե սա քաղաքական գործընթաց չէ, սա համազգային խնդիր է՝ մեծ-մեծ բառերով քողարկելով իրականությունը։ Ցանկացած քաղաքական հարցադրման նպատակ ունեցող հարց քաղաքական է, ուստի գլխավոր դերերում պետք է կուսակցությունները լինեն։ Կան առանձին մարդիկ, ովքեր մտահոգ են, անգամ եկեղեցու ներկայացուցիչներն են առաջնագծում, բայց, ամենայն հարգանքով վերաբերվելով այդ մարդկանց, պետք է ասեմ՝ խնդիրներն այդպես չեն լուծվում, ցավոք պետք է տեսնել, որ այդտեղ ոչ մի քաղաքական ուժ չկա»,- ասել է Տիգրան Թորոսյանը։