«Ժողովուրդն ով է, որ իրենք դուրս գան, նրա հետ հանդիպեն: Համ էլ` ըստ իրենց` ովքեր իրենց հետ չեն, իրենց ժողովուրդը չեն», այս մասին Սուրբ Աննա եկեղեցու բակում, պատասխանելով հարցին` ինչու իշխանությունը դուրս չի գալիս ժողովրդի հետ հանդիպելու, նշեց դերասան Դավիթ Հակոբյանը:

«Աշխարհում ամեն ինչ նույնն է` քարանձավից սկսած: Ժողովրդի մոտ դուրս է գալիս նա, ով մաքուր է ժողովրդի առաջ: Իսկ այս իշխանությունները գլոբալիստ են, եվրոպական կեղծ արժեքներն են տարածում` չկա հայրենիք, չկա ազգ: Ժողովրդին անընդհատ կերակրում են լավ ու խաղաղ ապրելու կեղծ քարոզով: Չի կարող լինել խաղաղ ու լավ կյանք, եթե չկա այն վայրը, որտեղ պետք է խաղաղ ու լավ ապրես: Սա կեղծ քարոզ է: Այնինչ միայն հիմարը չի ուզի խաղաղություն: Ու ստացվում է` եթե ես հիմա պայքարում եմ «խաղաղություն քարոզողի» դեմ, ուրեմն ես վատն եմ դառնում»,- նշեց դերասանը:

Նա նաև համոզմունք հայտնեց` յուրաքանչյուր մարդ, նաև` հոգևորականը, իրավունք ունի զբաղվելու քաղաքականությամբ` իր երկրի վիճակով: