Եվրոմիության անդամ երկրների արտգործնախարարների մասնակցությամբ երեկ կայացած հանդիպման ժամանակ հայտարարվել է, որ ԵՄ-ը առայժմ ոչ մի հիմք չունի Ռուսաստանի դեմ կիրառված տնտեսական պատժամիջոցների մեղմացման համար: Ինչպես նշում է «Ռոյթերս»-ը, Եվրոմիությունը հայտնել է, որ հատկապես Ուկրաինայի արևելքում վերջին մի քանի օրերի ընթացքում բախումների սաստկացումից հետո իրենք չեն կարող հանել ՌԴ դեմ կիրառված արգելքները:

«Ուկրաինայում ծավալված վերջին իրադարձություններից հետո մենք այլևս ոչ մի հիմք չունենք Ռուսաստանի հանդեպ կիրառված պատժամիջոցները վերանայելու համար»,- հայտարարել է Գերմանիայի արտգործնախարար Ֆրանկ-Վալտեր Շտայնմայերը:

Եվրոմիության ներկայացուցիչները նշել են նաև, որ, չնայած այդ ամենի, ԵՄ բոլոր երկրները շահագրգիռ են Ռուսաստանի հետ նորմալացնել հարաբերությունները, սակայն դեռևս մեկ խանգարող հանգամանք կա. այն, որ Ռուսաստանը անօրինական կերպով իրեն է միացրել Ղրիմը և դեռևս չի ցանկանում կատարել Մինսկի համաձայնագրով ստանձնած պարտականությունները: