Ամերիկացի դերասանուհի և մոդել, «Հիմնական բնազդի» աստղ 57-ամյա Շերոն Սթոունը լուսանկարվել է ավստրալական L'Officiel ամսագրի համար, որը կթողարկվի փետրվարին: Նա մարմնավորել է մի կնոջ կերպար, ով չի վախենում փորձություններից: «Տարիքի հետ մենք ավելի լավ ենք ընկալում կյանքը, մեզ և այլոց: Մենք ավելի ինքնավստահ ենք դառնում»,- հարցազրույցում ասել է նա:
Ինչպես նշել է ամսագրի խմբագիր Մեթյու Պարոզը, Սթոունը չի կաշկանդվում իր տարիքից ու ամեն անգամ ոգևորությամբ է խոսում ապրած տարիների մասին: «Ինչ վերաբերում է տարիքային փոփոխություններին, մարդիկ վախենում են փոխվել, նրանք վախենում են որևէ բան կորցնելուց»,- դերասանուհու խոսքերն է մեջբերում խմբագիրը:
Նշենք, որ Շերոն Սթոունը խաղացել է 70-ից ավելի ֆիլմերում, «Ոսկե Գլոբուս» մրցանակի դափնեկիր է։