Գերմանիայի կանցլեր Անգելա Մերկելը մեկնել է Վաշինգթոն՝ այսօր ԱՄՆ նախագահ Բարաք Օբամայի հետ ուկրաինական հակամարտությունը քննարկելու նպատակով: Այս մասին հաղորդում է «ԲիԲիՍի»-ն: Աղբյուրը նշում է, որ չնայած ԱՄՆ-ի նախագահի նկատմամբ կիրառվող ճնշումների՝ Ուկրաինային զենք տրամադրելու վերաբերյալ, Գերմանիայի կանցլերը դեռևս հույս ունի կարգավորել ուկրաինական հարցը դիվանագիտական ճանապարհով: Ուստի այսօր Մերկելը մտադիր է Միացյալ Նահանգների նախագահի հետ առանձին քննարկել հակամարտության կարգավորման նոր ծրագրի արդյունավետությունը, որն, ըստ տեղեկությունների, ենթադրում է սահմանի երկայնքով 50-70 կմ երկարությամբ ապառազմականացված գոտու ստեղծում: Նշենք, որ չորեքշաբթի օրն էլ կայանալու է «Նորմանդական քառյակի»՝ Ուկրաինայի, Ռուսաստանի, Գերմանիայի և Ֆրանսիայի ղեկավարների քննարկումը հակամարտության կարգավորման նոր ծրագրի ուղղությամբ: |