Ռուսաստանի նախագահ Վլադիմիր Պուտինը հայտարարել է, որ Կիևի իշխանությունների՝ հակամարտությունը լուծելու համար որդեգրած քաղաքականությունը երկրում ճգնաժամային իրավիճակ է ստեղծել: Եգիպտական «Ալ-Ահրամ» թերթին տրված հարցազրույցի ժամանակ Պուտինը՝ որպես հակամարտության կարգավորման սկիզբ, նշել է Կիևի իշխանությունների կողմից Դոնեցկում և Լուգանսկում կրակի դադարեցումն ու Դոնբասը տնտեսական շրջափակման ենթարկելու փորձերից հրաժարվելը: «Հակամարտության կարգավորման կարևորագույն նախապայմանը Ուկրաինայի արևելքում այսպես կոչված հակաահաբեկչական գործողությունների դադարեցումն է: Այն կարգավորելու համար պետք է, որ Կիևի իշխանությունները լսեն իրենց ժողովրդին, ընդհանուր լեզու գտնեն և երկխոսության մեջ մտնեն երկրի բոլոր շրջանների ներկայացուցիչների հետ»,- հայտարարել է Պուտինը: ՌԴ նախագահը հայտնել է նաև, որ ճգնաժամը շարունակվելու է այնքան ժամանակ, քանի դեռ «ուկրաինացիները պայմանավորվածության չեն եկել իրար միջև և վերջ դրել համատարած ազգայնականությանն ու ծայրահեղականությանը»։ |