Գերմանիայի և Ֆրանսիայի նախագահները նախորդ շաբաթ մեկնել էին նախ Կիև, ապա Մոսկվա՝ Ուկրաինայի և Ռուսաստանի նախագահներին ուկրաինական հակամարտության կարգավորման նոր ծրագիրը ներկայացնելու համար: Նորմանդական քառյակի երկրորդ հանդիպումը կայանալու է արդեն գալիք չորեքշաբթի՝ փետրվարի 11-ին, որտեղ 4 երկրների ղեկավարները քննարկելու են այդ ծրագրի արդյունավետությունը: Ինչպես գրում է «Wall Street Journal»-ը, Գերմանիայի կանցլեր Անգելա Մերկելը վերջնագիր է ներկայացրել ՌԴ նախագահ Վլադիմիր Պուտինին առ այն, որ վերջինն ընդունի ուկրաինական խնդրի կարգավորման իրենց առաջարկած նոր ծրագիրը: Աղբյուրը, հղում անելով արևմտյան մի շարք քաղաքագետ-փորձագետների, նշում է, որ Պուտինին հայտնել են, որ Մերկելի և Օլանդի նոր պլանը չընդունելու դեպքում Ռուսաստանի համար կրկին անբարենպաստ պայմաններ են ստեղծվելու, քանի որ Եվրոմիությունն ու ԱՄՆ-ը չեն հապաղի ՌԴ դեմ նոր պատժամիջոցներ կիրառելու հարցում: Նշենք, որ այդ ամենին զուգընթաց՝ Միացյալ Նահանգներում գնալով մեծանում է այն կոնգրեսականների թիվն, ովքեր հակված են ՌԴ դեմ պատժամիջոցներ կիրառելու փոխարեն ավելի կտրուկ գործողությունների դիմելուն, մասնավորապես՝ Ուկրաինային ռազմական օգնություն ցուցաբերելուն: |