Վրաստանի նախկին նախագահ Միխայիլ Սահակաշվիլին, ով այժմ զբաղեցնում է Ուկրաինայի նախագահ Պետրո Պորոշենկոյի խորհրդականի պաշտոնը, հայտարարել է, որ պատրաստվում է զբաղվել Ուկրաինային զենք տրամադրելու խնդրի կարգավորմամբ: Այս մասին հաղորդում է «Ռոյթերս»-ը՝ հղում անելով ռուսական լրատվամիջոցներին: «Այժմ ամենակարևոր խնդիրն Ուկրաինային զենքով աջակցելն է: Հաջորդ մի քանի օրերի ընթացքում ես կզբաղվեմ այդ հարցով»,- հայտարարել է Սահակաշվիլին: Վրաստանի նախկին նախագահը խոսել է նաև Պորոշենկոյի խորհրդականի իր նոր պաշտոնի մասին՝ նշելով, որ ինքը պատրաստվում է մնալ անկախ քաղաքական գործիչ և մտադիր չէ Ուկրաինայի քաղաքացիություն ստանալ: Նշենք, որ Պետրո Պորոշենկոյի փետրվարի 13-ի հրամանով Միխայիլ Սահակաշվիլին նշանակվել է Ուկրաինայի նախագահի խորհրդական: |