Այսօր առավոտյան միջազգային շուկայում նավթի գների աճ է գրանցվել: Պատճառն էներգետիկ բազմաթիվ կազմակերպությունների կողմից արտադրության ծավալների ու ծախսերի կրճատման մասին տարածված տեղեկատվությունն է: Սակայն վերլուծաբանները կարծիք են հայտնել, որ նավթի գների բարձրացումը ժամանակավոր բնույթ է կրում, և առաջիկայում «սև ոսկու» արժեքի անկում է սպասվում: Այսպես, Եվրոպայում արդյունահանվող հյուսիսծովյան «Բրենթ» մակնշման նավթի 1 բարելն առավոտյան գնահատվել է շուրջ 62 դոլար, նոխօրեին` շուկայի փակման ժամանակ ունեցած արժեքից մոտ 0,88 տոկոսով ավել: Ամերիկյան թեթև նավթը գնահատվել է 0,44 տոկոսով ավել` 53,01 դոլար: Նշենք, որ ավելի վաղ ֆրանսիական «Տոտալ» նավթային ընկերությունը հայտարարել էր, որ շուկայում տիրող անկայուն իրավիճակի պատճառով մտադիր է առաջիկայում աշխատանքից հեռացնել մոտ 2 հազար աշխատակցի, ինչպես նաև 2017թ. վաճառել իր արժեթղթերի մի մասը` 5,5 միլիարդ դոլար արժողությամբ: Աշխատակազմում կրճատումներ կատարելու մասին հայտարարություն է արել նաև ամերիկյան «General Electric»-ը: Այն կկրճատի իր աշխատակիցների շուրջ 45 տոկոսին, իսկ ամերիկյան մեկ այլ նավթային կազմակերպություն` «Lariat Services»-ը կկրճատի 265 աշխատակցի: |