Կանադայի վարչապետ Սթիվեն Հարփերը հայտարարել է, որ իր երկիրն ընդլայնում է Ռուսաստանի դեմ կիրառված պատժամիջոցները: Ինչպես հաղորդում է «Ռոյթերս»-ը, Կանադայի նոր պատժամիջոցների ցանկում այս անգամ ներառվելու են նաև ռուսական նավթագազային «Ռոսնեֆտ» ընկերությունը, «Ռոստեխ» ռուսական արդյունաբերական կորպորացիայի գործադիր տնօրենը ու Ռուսաստանի և Ուկրաինայի 37 քաղաքացիներ:

Աղբյուրը նշում է, որ բացի 37 քաղաքացիներից, որոնց արգելվելու է մուտք գործել Կանադայի տարածք, երկիրը պատժամիջոցներ է սահամել նաև ռուսական և ուկրաինական 17 ընկերությունների հանդեպ:

«Մեր դիրքորոշումը հստակ է. մենք շարունակում ենք սատարել Ուկրաինայի տարածքային ամբողջականությունն ու ինքնիշխանությունը: Այս նոր պատժամիջոցները իրական սպառնալիք կհանդիսանան Ռուսաստանի համար: Մենք հայտարարում ենք, որ պատրատ ենք շարունակել մեր այս քաղաքականությունը, եթե ՌԴ կառավարությունը չփոխի Ուկրաինայի հարցում ունեցած իր դիրքորոշումը»,- նշել է Հարփերը: