Մոսկվայում սպանված ընդդիմադիր գործիչ Բորիս Նեմցովի ընկերուհին՝ մոդել Աննա Դուրիցկայան, ով սպանության ժամանակ Նեմցովի կողքին է եղել, լքել է Ռուսաստանը: «Աննա Դուրիցկայան մեկնել է Կիև: Մոսկվայում գտնվող ուկրաինացի դիվանագետներն արել են ամեն ինչ մեր քաղաքացու՝ հայրենիք վերադառնալու համար»,- «Թուիթեր»-ի իր էջում գրել է Ուկրաինայի արտգործնախարարության մամուլի ծառայության ղեկավար Եվգենի Պերեբիյնեսը: Նշենք, որ մինչ հայրենիք վերադառնալը Դուրիցկայան նամակ էր ուղարկել Ուկրաինայի հյուպատոսություն՝ խնդրանքով, որ աջակցեն իրեն հայրենիք վերադառնալու հարցում:

Հավելենք նաև, որ Դուրիցկայան հարցազրույց էր տվել «Դոժդ» հեռուստաալիքին ու պատմել, որ մարդասպանին չի տեսել, նա մեջքից է կրակել ու փախել սպիտակ մեքենայով, բայց մեքենայի պետհամարանիշը և մակնիշը աղջիկը մտապահել չի կարողացել:

Հիշեցնենք, որ ավելի վաղ սպանության մասին Դուրիցկայան պատմել էր իր մորը: