Բելգիայի «Հումանիստական ժողովրդավարական կուսակցության» անդամ ազգությամբ թուրք պատգամավոր Մահինուր Օզդեմիրը հեռացվել է հարազատ կուսակցության շարքերից: Ինչպես հաղորդում է «Anadolu Agency»-ն, Օզդեմիրին հեռացրել են Հայոց ցեղասպանությունը ճանաչել հրաժարվելու պատճառով: Աղբյուրը նշում է` Օզդեմիրն, ով առաջին կին պատգամավորն է, որ մուտք է գործել Բելգիայի խորհրդարան մահմեդականների գլխաշորով, անձամբ է հայտնել, որ ինքը հրաժարվել է 1915թ. իրադարձությունները ցեղասպանություն կոչել, ինչի պատճառով էլ իրեն հեռացրել են հարազատ կուսակցության շարքերից: Նշենք, որ ավելի վաղ կուսակցության ղեկավար Բենոիթ Լութգենը հայտնել էր, որ իրենք չեն պատրաստվում կուսակցությունում պահել այնպիսի անդամների, որոնք կհրաժարվեն ճանաչել 1915թ. Հայոց ցեղասպանությունը: |