ԱՄՆ նախագահ Բարաք Օբաման և Գերմանիայի կանցլեր Անգելա Մերկելը քննարկել են Ուկրաինայում վերջին օրերին տիրող լարված իրավիճակը: Ինչպես հաղորդում է Սպիտակ տան պաշտոնական կայքը, երկու երկրների ղեկավարներն այդ առիթով կոչ են արել Ռուսաստանին կատարել Մինսկի համաձայնագրով ստանձնած պարտականությունները: «Նախագահ Օբաման հեռախոսազրույց է ունեցել Անգելա Մերկելի հետ, որի ընթացքում երկու երկրների ղեկավարները քննարկել են Ուկրաինայի արևելյան հատվածում աճող լարվածության հարցը, որն ի հայտ է եկել շփման գծի երկայնքով ռուսական և ռուսամետ անջատական զորքերի համատեղ հարձակումների արդյունքում: Այս համատեքստում ԱՄՆ նախագահը բարձր է գնահատել Ուկրաինայի` Մինսկի համաձայնագրի կատարման ճանապարհին գրանցած առաջընթացն ու կոչ է արել Ռուսաստանին՝ հետևել Ուկրաինայի օրինակին»,- նշվում է Սպիտակ տան հայտարարության մեջ: |