«Հասարակության շրջանում կարծիք կա, որ ընթերցողների թիվը քիչ է, որ երիտասարդները գիրք չեն կարդում, բայց ես չեմ կիսում այդ կարծիքը: Ունենք բավականին մեծ թվով ընթերցողներ, մոտ 15 հազար ընթերցող` ուսանողներ, և 10 հազարից ավելի գիտաշխատողներ, տարբեր բնագավառի մասնագետներ, դասախոսներ և այլն»,- ՄԱՄՈՒԼ.am-ի թղթակցի հետ զրույցում ասաց Ազգային գրադարանի սպասարկման բաժնի վարիչ Անահիտ Քեհեյանը:
Նրա խոսքով` ներկայում ընթերցողների թիվը բավականին աճել է, քանի որ սպասարկումն ավելի հարմարավետ է դարձել: «Նաև համակարգչային սպասարկում ունենք: Գրադարանը պարբերաբար թարմացվում ու հագեցվում է նոր գրքերով, ընթերցանության շարքն ամբողջացվում է նոր գրականությամբ: Այս տարի` Հայոց ցեղասպանության 100-ամյակի կապակցությամբ մենք ստացել ենք Ցեղասպանության պատմություն, բացել ենք մեկ դարակային սպասարկում ևս, որտեղ ցուցադրված են բավականին մեծ թվով գրքեր` Հայոց ցեղասպանությունը ներկայացնող»:

Անդրադառնալով երեկ՝ Գրադարանավարի օրվան նվիրված միջոցառումներին, նշեց.
«Թամանյանական մասնաշենքի մեծ ցուցասրահում բացվեց «Ցեղասպանությունը գեղարվեստական գրականության մեջ» խորագրով գրքերի ցուցադրություն, որը բավականին հետաքրքրություն առաջացրեց ևʹ ընթերցողների ևʹ աշխատողների կողմից»,-ասաց Անահիտ Քեհեյանը:

Նրա խոսքով` այսօր համակարգիչների միջոցով սպասարկումը դարձել է բավականին արագ: «Սպասարկման ոլորտում ուշացումների հետ կապված խոչընդոտները կարողացել ենք վերացնել: Այդ բոլորը նպաստում են, որ մեր ընթերցողները կարողանան հաճույքով գալ գրադարան: Հիմա շենքը վերանորոգվում է, շուտով նաև ջեռուցման հարցը կլուծվի»:
Ըստ նրա` երիտասարդները ևʹ գրքից ևʹ համակարգչային տարբերակից հավասարապես օգտվում են:
«Աստիճանաբար ողջ գրադարանային ունեցվածքը թվայնացվում է, ուստի մեզ մոտ տեղի է ունենում կադրային վերապատրաստում: Ազգային գրադարանն աշխատում է ամեն օր, մեր դռները բաց են առավոտյան ժամը 9:00-ից երեկոյան 20:00-ը»,- ամփոփեց Անահիտ Քեհեյանը: