Ի պատասխան Թուրքիայի կողմից ռուսական կործանիչի ոչնչացման` ՌԴ նախագահ Վլադիմիր Պուտինը նախօրեին հրամանագիր է ստորագրել, որով ազգային անվտանգության պահպանման նկատառումներով տնտեսական պատժամիջոցներ են սահմանվում Թուրքիայի նկատմամբ: Փաստաթուղթը հրապարակված է Կրեմլի պաշտոնակայքում: Հրամանագրով արգելք կամ սահմանափակումներ են կիրառվում Ռուսաստանում Թուրքիայի իրավասության տակ գործող կազմակերպությունների նկատմամբ: Գործատուներին արգելել է նաև աշխատանքի վերցնել Թուրքիայի քաղաքացիներին. այդ սահմանափակումն ուժի մեջ կմտնի գալիք տարվա հունվարի 1-ից: Արգելվել է նաև Թուրքիայից Ռուսաստան առանձին ապրանքների ներկրումը: Այդ ապրանքների ցուցակը կկազմի կառավարությունը: Այս արգելքը, սակայն, չի սահմանվի այն ապրանքների վրա, որ Ռուսաստան են բերվում ՌԴ քաղաքացիների կողմից` անձնական օգտագործման համար: Փաստաթղթում ընդգծվում է, որ տուրօպերատորներին խորհուրդ է տրվում զերծ մնալ դեպի Թուրքիա ուղեգրեր տալուց: Բացի այդ, Պուտինի հրամանով դադարեցվում են Ռուսաստան-Թուրքիա չարթերային չվերթները: Հավելենք, որ 2016թ. հունվարի 1-ից Թուրքիայի քաղաքացիների համար այլևս չի գործելու դեպի Ռուսաստան առանց վիզայի մուտքի ռեժիմը: Հաղորդվում է, որ Թուրքիայի հանդեպ տնտեսական պատժամիջոցների վերջնական ցուցակը ՌԴ վարչապետ Դմիտրի Մեդվեդևը կհրապարակի առաջիկա մի քանի օրերին: |