Իրավապահ մարմինները զբաղվում են Լեհաստանի Բիելսկո Բիալա քաղաքի խանութներից մեկում ՀՀ Զինված ուժերին մատակարարվող պահածոների վաճառքի մասին սոցցանցերում շրջանառվող տեղեկատվությամբ: «Այդ ապրանքների պիտակների վրա հայերեն նշվում է «Զինվորի բաժին» և «վաճառքի ենթակա չէ», իսկ պատվիրատուն ՀՀ պաշտպանության նախարարությունն է»,- գրել է Գալիկյանը, և որպես ապացույց` հրապարակել Լեհաստանում ապրող ընկերոջից ստացված լուսանկարները: Փաստաբանը նշել է, որ զինվորական համազգեստի հետ միասին այդ օրապահիկն արժե 500 զլոտի, այսինքն` 160 դոլար: Փաստաբան Գարիկ Գալիկյանի ֆեյսբուքյան գրառմանն արձագանքել է ՀՀ պաշտպանության նախարարի մամուլի խոսնակ Արծրուն Հովհաննիսյանը: «Հարգելիներս, այս հարցով արդեն իրավապահ մարմինները զբաղվում են: Մենք դիմել ենք բոլոր համապատասխան ատյաններին»: Գլխավոր դատախազությունից էլ տեղեկանում ենք, որ Լեհաստանում ՀՀ դեսպանը պաշտոնական նամակով դիմել է Լեհաստանի դատախազությանը, պահածոների վաճառքի մասին տեղեկատվությունն ստուգելու, նման ապրանքատեսակի ձեռքբերման աղբյուրը պարզելու և անհրաժեշտության դեպքում` համապատասխան իրավական գործընթաց իրականացնելու խնդրանքով»: |