Մեկնարկում է Սոս Սարգսյանի անվան Համազգային թատրոնի 25-րդ հոբելյանական թատերաշրջանը: «Այս տարի մեր թատրոնի հիմնադրման 25-րդ ամյակն է: Սկսում ենք առաջին ներկայացումը պրեմիերայով. հայ հանդիսատեսի դատին կհանձնենք Սաշա Գիթրիի «Արի երազենք…» կատակերգությունը՝ Ժիրայր Բաբազյանի բեմադրությամբ»,- լրագրողների հետ զրույցում ասաց թատրոնի ղեկավար Վարդան Մկրտչյանը: Նրա փոխանցմամբ` խաղաշրջանի 2-րդ պրեմիերան կլինի Վիլյամ Սարոյանի «Քո կյանքի ժամերը»՝ Արմեն Էլբակյանի բեմադրությամբ։ «Կարծում եմ, Արմեն Էլբակյանը մեր իրականության մեջ Սարոյանի լավագույն մեկնաբանն է: Ինձ համար սկզբունքային հարց է Համազգային թատրոնը ստեղծագործական առումով բաց պահել: Մենք պետք է բաց լինենք և հնարավորություն տանք նոր մտածողներին, նոր էսթետիկաների հետ առընչվենք: Այս առումով փորձելու ենք նաև դրսից ռեժիսորներ ներգրավել»: Վարդանի խոսքով` պատրաստվում է նաև «Կռվի գենեզիս» ներկայացումը, որը նվիրված է լինելու արցախյան հերոսամարտին. «Այն դոկումենտալ թատրոնի ժանրին է պատկանում, որը կբեմականացնի Նարինե Գրիգորյանը: Իսկ մեր 4-րդ պրեմիերան, որ նախատեսում ենք, «Ադամի կողոսկր» կատակերգությունն է, որը կբեմադրի Սերժ Մելիք Հովսեփյանը: 25-րդ թատերաշրջանում բազմաթիվ անակնկալներ կլինեն հանդիսատեսի համար, որոնց մասին դեռևս չեմ ուզում բարձրաձայնել»: Թեև շատերը սպասում էին, որ Համազգային թատրոնի 25-ամյակը կնշանավորվի թատրոնի նոր շենքի կառուցմամբ, բայց թատրոնը դեռ շարունակում է մնալ հյուրի կարգավիճակում: «Ես լսել եմ խոստումներ, որ շատ շուտով, Կառավարության որոշմամբ, այդ հարցը պետք է լուծվի: Այս հարցն այլևս հետաձգելու տեղ չկա»: Վարդանն այս առիթով հիշեց ֆրանսիացի դիվանագետ Թալեյրանի խոսքերը. «Խոսքը ոչինչ է, եթե չի փոխանցվել թղթին: Կարծում եմ, մեզ ուղղված խոսքը կհանձնվի թղթին»,- հույս հայտնեց թատրոնի ղեկավարը: |