Մյոնխենգլադբախի «Բորուսիա»-ի և «Կայզերսլաուտերն»-ի նախկին ֆուտբոլիստ Մարսելո Պլետշը Բրազիլիայի դատարանի կողմից դատապարտվել է 9 տարվա և 2 ամսվա ազատազրկման՝ թմրանյութերի ապօրինի շրջանառության համար։ Նշվում է, որ նա իր պատիժը կկրի բրազիլական Կասկավել քաղաքի բանտում։

Նշենք, որ Պլեշտը մարզական կարիերան ավարտել է 2011 թվականին, ինչից հետո աշխատել է Բրազիլիայում՝ ֆերմայում։ 2015-ի նոյեմբերին Տոլեդո քաղաքի ոստիկանությունը կանգնեցրել է իր վարած մեքենան, որի մեջ հայտնաբերվել է 793 կգ մարիխուանա։ 2015-ի նոյեմբերի 10-ից բրազիլացի ֆուտբոլիստի նկատմամբ քննություն է ընթանում։ Մեղադրանքներն առաջադրելուց հետո 40-ամյա Մարսելոն շարունակել է հերքել դրանք և մտադիր է բողոքարկել որոշումը, չնայած որ նրա փաստաբանները չեն հավատում գործի դրական ելքին։