Ինչպես արդեն տեղեկացրել էինք, երեկ ԱԱԾ շենքում պետք է կայանար ՀՀ պաշտպանության նախկին փոխնախարար, զինված խմբի գործով մեղադրյալ Վահան Շիրխանյանի մամուլի ասուլիսը: Լրատվամիջոցները երկու ժամ սպասելուց հետո պարզել են, որ հանդիպումը չի լինելու: Շիրխանյանի պաշտպան Հայկ Ալումյանն ԱԱԾ-ի այդ քայլը որակել է աճպարարություն: «Շիրխանյանը պատրաստվում էր մանրամասներ ներկայացնել Նորք Մարաշի զինված խմբի հետ կապված, ինչպես նաև հայտնել, թե ինչու են իր նկատմամբ հետապնդումներ իրականացվում, ում կողմից են դրանք հրահրված և այլն»: Ալումյանը նշել է, որ նրա առողջական վիճակը վատ է և ստացիոնար բուժում է հարկավոր: Այս կապակցությամբ Քրեակատարողական ծառայությունն այսօր հայտարարություն է տարածել: Ըստ այդմ` 2016թ. հոկտեմբերի 6-ին Վ. Շիրխանյանը «Աղաբեկյան» ախտորոշիչ կենտրոնում ենթարկվել է ստորին վերջույթների դուպլեքս հետազոտության: Անցկացված հետազոտությունները փաստել են, որ ՀՀ ԱՆ «Երևան-Կենտրոն» ՔԿՀ-ում պահվող կալանավորված անձ Վահան Շիրխանյանի մոտ առողջական վիճակի վատթարացում չի նկատվել, և վերջինն իր բուժումը կարող է ստանալ քրեակատարողական հիմնարկի պայմաններում, բժիշկների դինամիկ հսկողության ներքո»,- նշված է հայտարարության տեքստում: |