ՀՀ 2013թ. պետական բյուջեի կատարման մասին» տարեկան հաշվետվության քննարկումներին ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը ՀՀ գլխավոր գանձապետ, ՀՀ ֆինանսների նախարարի տեղակալ Ատոմ Ջանջուղազյանից հետաքրքրվեց, թե ինչի վրա է ծախսվել ռուսական 500 միլիոն դոլար վարկը:

«Վարկի հետ կապված մութ պատմություններ կան, 500 միլիոնն ի՞նչի վրա է սպառվել: Ասում են՝ գործարարներին և մերձավորներին են տվել», - նշեց նա։

Ատոմ Ջանջուղազյանը նշեց, որ վարկի օգտագործման վերաբերյալ տեղեկատվությունը ներառված է եղել դեռ 2009 թ-ի բյուջեի տեղեկանքի մեջ, մի մասն օգտագործվել է որպես ծախսային ծրագրերի ֆինանսների աղբյուր՝ աղետի գոտում շինարարության համար, իսկ կեսից ավելին՝ օգտագործվել է վարկերի տրամադրման համար: «Այս պահին կդժվարանամ բոլորն ասել», - նշեց նա և ավելացրեց, թե ցուցակը տրամադրված է։

Նաիրա Զոհրաբյանը նաև խնդրեց պարզաբանել, թե արդյո՞ք տվյալներ ունի, թե որքան է եղել կենսաապահովման մթերքների գնաճը: Զեկուցողն ասաց, որ այդ մասին ձեռքի տակ տվյալներ չունի, սակայն հետագայում կարող է տրամադրել պահանջվող տեղեկությունը։