ԱՄՆ գլխավոր դատախազ Ջեֆ Սեշնսը հրաժարական է տվել: Այս մասին ԱՄՆ նախագահ Դոնալդ Թրամփը հայտնել է Twitter-ի իր էջում: «Շնորհակալություն ենք հայտնում գլխավոր դատախազ Ջեֆ Սեշնսին իր ծառայության համար և մաղթում լավագույնը»,- գրել է նա: Սեշնսին ժամանակավորապես կփոխարինի Մեթյու Ուիթաքերը: BBC-ի տեղեկություններով՝ Ջեֆ Սեշնսը հրաժարական է տվել նախագահ Թրամփի խնդրանքով: Նշվում է, որ Թրամփը բազմիցս քննադատել է գլխավոր դատախազին արդարադատության նախարարությունը ոչ արդյունավետ ղեկավարելու համար: Նրա խոսքով՝ գերատեսչության աշխատակիցներն իր դեմ դավեր են նյութել: Սեշնսը Թրամփի աջակիցն էր ընտրական քարոզարշավի ժամանակ, սակայն նրանց հարաբերությունները վատթարացան, երբ Սեշնսը հրաժարվեց ընտրություններին ռուսական հետքի մասին գործը վարելուց:
|