Փետրվարի 12-ին Ազգային ժողովում ներկայացնելով կառավարության 5 տարվա գործունեության ծրագիրը, ՀՀ վարչապետը տեղեկացրեց, որ ներկայում Հայաստանում 300 մլրդ դրամ կա, որը կողմերից ոչ մեկին չի պատկանում, քանի որ գործերը դատարանում են:

Կառավարության այսօրվա նիստում անդրադառնալով վերոնշյալին՝ ՀՀ վարչապետը հանձնարարեց. «Կառավարությունն ու ԿԲ-ն պետք է լրջորեն համագործակցեն տոկոսադրույքների նվազեցման մեր ռազմավարության ու քաղաքականության վերաբերյալ: Ես իմ ելույթում ասացի, որ ԿԲ մոտավոր հաշվարկներով 300 մլրդ դրամ գտնվում է բանավեճային փուլում, այն ոչ մեկինը չէ, որովհետև դատական համակարգը ժամանակին այդ լուծումը չի տալիս, ընդ որում, չնայած դրա կեսի վերաբերյալ բանավեճ չկա, բայց կա իրավական պրոցեդուրա, որը պետք է անցնի: Բանկիրների հետ նախորդ անգամ պայմանավորվել ենք օրենսդրական լուծումներ առաջարկելու վերաբերյալ, որ լուծվի խնդիրը: 300 մլրդ դրամի հայտնվելը ֆինանսական շուկայում հնարավորություն կստեղծի տոկոսների նվազեցման համար»,- ընդգծեց նա: