«Ժառանգություն» կուսակցության նախագահ Նարինե Դիլբարյանը ֆեյսբուքյան իր էջում գրել է. «Այս ի՛նչ աղետալի անկում է, ո՞ւր են այս ահազարհուր պատերազմի դադարեցման հայկական կողմի պատասխանատուները, որ պետք է հետևեին ստորագրած եռակողմ «հայտարարությանը»: Նիկոլ Փաշինյա՛ն, Արայիկ Հարությունյա՛ն, հեռուն գնացող ծրագրերի մասին եք խոսում, իսկ Ադրբեջանն ամեն օր քարտեզ է փոխում, դեմարկացիոն գծեր անցկացնում՝ ի հոշոտում հայ բնակիչների: Հայկական երկու պետությունների ղեկավարները զբաղվում են ամեն ինչով, խոտելի իմիտացիա՝ նախարար նշանակելով, հանելով, հեռու ապագային առնչվող «ճանապարհային քարտեզներով»՝ օրակարգային խնդիրը թողած, իրենց հրաժարականի պահանջն այլոց վրա տարածելով: Արդեն տասնյակից ավելի գյուղեր է կլանել Ալիևը, հիմա ի՞նչ է կատարվում Վազգենաշենում և Բերդաշենում, այդ ի՞նչ քարտեզով են առաջնորդվում ՀՀ և Ադրբեջանի պաշտպանության նախարարությունները ռուս խաղապահների հետ, որ հայ բնակչությանը դուրս են անում իրենց տներից, մնացած փշրանքներում էլ մարդիկ ինչպե՞ս պետք է ապրեն, երբ ենթակառուցվածքները մնում են ադրբեջանցիներին՝ կապի մալուխներ, խողովակաշարեր, գազատարներ, ոռոգման և խմելու ջրագծեր, ադրբեջանցիներն էլ դրանք հետևողականորեն վնասում են, Արցախի իբրև փրկված մասերի համար Նախիջևանի ճակատագիրն եք ստորագրել: Ո՞ւր է հայոց պետականությունը, այդքան անկյալ ենք, կեղծ օրակարգերով մտահոգ, որ մարդիկ նորօրյա «Դեր էլ Զորի ճամփորդ» են դարձել՝ Փաշինյանի կանխատեսմամբ»: