«Հայրենիքի փրկության շարժման» վարչապետի թեկնածու Վազգեն Մանուկյանը գյումրեցիների հետ հանդիպման ժամանակ անդրադարձավ Արցախյան վերջին պատերազմին և այն շարժառիթներին, որը հանգեցրեց և անխուսափելի դարձրեց պատերազմը: «Փաշինյանն արցախյան բանակցային ողջ գործընթացը տապալեց: Մեզ ասաց՝ Արցախը մեզ հետ կապ չունի, թող իրենք որոշեն, Արցախը ինձ չի ընտրել, ես միայն Հայաստանից եմ ընտրվել: Հետո մի շատ վտանգավոր նախադասություն ասաց, որից Բաքուն միանգամից բռնեց, ասաց՝ «Արցախը Հայաստան է և վերջ»: Ամբողջ 30 տարվա մեջ մենք ապացուցում էինք, որ Արցախն ինքնորոշման հարց է լուծում: Փաշինյանը դա դարձրեց տարածքային հարց: Դրա համար, երբ Ադրբեջանը հարձակվեց, մեզ ոչ մեկ չպաշտպանեց, որովհետև Ադրբեջանը պաշտպանում է իր տարածքները»,- ասաց Մանուկյանը: Նրա խոսքով՝ Փաշինյանն իր կառավարման ընթացքում «հենց առաջին օրերից սկսեց բանակին վարկաբեկել՝ քրգործեր հարուցելով գեներալների նկատմամբ»: «Փաշինյանը պետական մտածողություն չունի, իսկ նման մարդն իրավունք չունի երկիր ղեկավարել»,- ասաց Մանուկյանը: |