Հյուսիսային Կորեայում արգելել են «մալետ» սանրվածքը, փիրսինգի որոշ տեսակներ և նեղ ջինսեր՝ երկիրը արևմտյան նորաձևության «անկումային» միտումներից պաշտպանելու համար:
Միջոցառումները ձեռնարկվել են «Ռոդոն Սինմուն» պաշտոնական թերթում հրապարակված հոդվածից հետո այն մասին, թե ինչ է անհրաժեշտ անել «կապիտալիստական մշակույթի կողմից երկրի գրավումը կանխելու համար», հաղորդել է հարավկորեական Yonhap գործակալությունը:
«Ռոդոն Սինմունը» հոդված է հրապարակել, որում մտահոգություն է հայտնում, որ երիտասարդ հյուսիսկորեացիներն ավելի ու ավելի շատ են հետևում արևմտյան նորաձևության միտումներին:
«Մենք պետք է վախենանք կապիտալիստական կենսակերպի նույնիսկ չնչին նշաններից և պայքարենք՝ դրանցից ազատվելու համար»,- ասված է հոդվածում:
Հաղորդվում է, որ իշխանություններն օրենքից դուրս են հայտարարել բոլոր սանրվածքները՝ բացառությամբ 15-ի, և «ճիշտ» սանրվածքների մասին հրաման են արձակել: