Նորմանդական ձևաչափով շուտափույթ հանդիպում անցկացնելու Կիևի կոչերը, որի ժամանակ վերջիններս պատրաստվում են հրաժարվել Մինսկի համաձայնագրերի կատարումից, վկայում են Ուկրաինայի արտաքին քաղաքականության «շիզոֆրենիայի» մասին: Այս մասին այսօր հայտարարել է ՌԴ արտգործնախարար Սերգեյ Լավրովը: «Երբ ուկրաինական կողմն՝ արտգործնախարարի մակարդակով, հնարավորինս շուտ հանդիպում է պահանջում նորմանդական ձևաչափով, և միևնույն ժամանակ, Ուկրաինայի ղեկավարության մյուս անդամները հայտարարում են, որ չեն կատարի այդ պայմանավորվածությունները, նման պառակտումը գիտակցության մեջ արտաքին քաղաքական շիզոֆրենիայի դրսեվորում է»,- ասել է Լավրովը: Նա ընդգծել է, որ նորմանդական ձևաչափը նախատեսված է պայմաններ ստեղծելու՝ «Մինսկի համաձայնագրերի ամբողջական և հետևողական իրականացման համար» և այդ ձևաչափով հանդիպումն իմաստ չունի, եթե այնտեղ չեն քննարկվելու Մինսկի համաձայնագրերը: «Հանդիպում՝ հանուն հանդիպման պետք չէ մեզ»,- ասել է ՌԴ ԱԳՆ ղեկավարը: