Դատախազության մոտ հաջակցություն Արմեն Չարչյանի բողոքի ակցիա իրականացնող ԵՊՀ դասախոս, բժիշկ Սամվել Սահակյանը հանդիպել է գլխավոր դատախազի հետ: Դուրս գալով շենքից բժիշկը լրագրողներին ներկայացրեց, թե ինչ զրույց է ունեցել վերջինի հետ. «Ես ներկայացրեցի Ա. Չարչյանի հիվանդության վիճակը, փորձեցի հիմնավորել հիմա քաղաքացիական հիվանդանոցում նրա գտնվելու, բուժման և բուժման արդյունավետության հավանականության կարևորությունը...: Պարոն դատախազն ուշադիր լսեց, հարցեր տվեց և ինձ հավաստիացրեց, որ իրենց նպատակը չէ Չարչյանին պահել անազատության մեջ»,- ասաց բժիշկը՝ շարունակելով. «Դատախազն ասաց, որ կողմ է իմ դիրքորոշմանը, պարզապես համապատասխան ախտորոշումների հիմնավորումներ է պետք ներկայացնել: Դա ներկայացնելու դեպքում խոսք տվեց, որ ամեն ինչով մեզ կօգնի, իրենք ևս կմիջնորդեն հրատապ նիստ հրավիրելու հարցով, որտեղ, եթե մեր փաստաթղթերը համարեն հիմնավոր, նաև մեր խնդրանքի երկրորդ բաժինը կկատարվի»,-ասաց նա: Ակցիայի մասնակիցները նշեցին, որ իրենց բողոքի ակցիան կշարունակեն Առողջապահության նախարարության մոտ: |