Ռուսաստանի արտաքին գործերի նախարարությունը պատժամիջոցներ է սահմանել Մեծ Բրիտանիայի 49 քաղաքացու նկատմամբ։ Նրանց թվում են մի շարք խոշոր լրատվամիջոցների թղթակիցներ ու ղեկավարներ, զինված ուժերի հրամանատարության, ռազմարդյունաբերական համալիրի և պաշտպանական համալիրի ներկայացուցիչներ։ Մասնավորապես, պատժամիջոցներ են սահմանվել հետևյալ լրատվական գործակալությունների գլխավոր խմբագիրների նկատմամբ՝ Guardian - Քեթրին Սոֆի Վիներ, Times - Ջոն Ուիզերոու, The Daily Telegraph - Քրիս Էվանս, Daily Mail - Էդվարդ Վերիթի, The Independent - Քրիստիան Բրոթոն: Բացի այդ, ցուցակում ընդգրկված են այս գործակալությունների լրագրողներ, սյունակագիրներ, թղթակիցներ և հաղորդավարներ, ինչպես նաև BBC-ի, Sky News-ի, Channel 4 News-ի, ITV-ի, Financial Times-ի և The Sunday Times-ի աշխատակիցներ: «Ցուցակում ընդգրկված բրիտանացի լրագրողները ներգրավված են Ռուսաստանի և Ուկրաինայի ու Դոնբասի իրադարձությունների մասին կեղծ և միակողմանի տեղեկատվության կանխամտածված տարածման մեջ: Իրենց կանխակալ գնահատականներով նրանք նաև նպաստում են բրիտանական հասարակության մեջ ռուսաֆոբիայի հրահրմանը»,- ասվում է ԱԳՆ-ի հայտարարության մեջ։ |