Քաղաքական մեկնաբան Հակոբ Բադալյանի ֆեյսբուքյան գրառումը. «Երևանի փողոցների վիճակը գործնականում ունի առողջապահական նշանակություն: Իշխանությունն այդ կերպ պայքարում է Ալցհեյմերի հիվանդության դեմ, առավել ևս, որ միջազգային ճանաչված մասնագետները արձանագրում են հիվանդության երիտասարդացման միտում:
Քաղաքի փողոցների փոսերը այնքան առատ են, և ավելանում են այնպիսի արագությամբ, որ վարորդները գիշերային երթևեկության համար պարզապես պարտավոր են անգիր անել այդ փոսերի տեղերը, հաշվի առնելով այն, որ Երևանում չկա նաև գիշերային լուսավորություն: Լույսեր կան, լուսավորություն չկա: Եվ որպեսզի մութն ընկնելուն պես մեքենայով չդեգերեք փոսերի մեջ, պետք է հիշեք դրանց տեղը:
Մինչդեռ հայտնի է, որ Ալցհեյմերի հիվանդությունից խուսափելու համար պետք է անընդհատ մարզել ուղեղը, ուղեղին տալ նոր առաջադրանքներ: Ամեն մի նոր փոս, որ առաջանում է երևանյան որևէ փողոցում, նոր առաջադրանք է ուղեղին, հետևաբար մի նոր քայլ Ալցհեյմերի հիվանդության կանխարգելման ուղղությամբ:
Պետք է գնահատել հոգատարությունը»: