ԱԺ նախկին պատգամավոր Արման Աբովյանը ֆեյսբուքյան իր էջում գրել է. «Արցախը արդեն համարյա կես տարի շրջափակման մեջ է։
Արցախահայության գլխին կախված է իրական ցեղասպանության վտանգը։
Թուրք-ադրբեջանական զինված ավազակային խմբավորումները գրեթե ամեն օր գնդակոծում են Արցախի և Հայաստանի ինքնիշխան տարածքները։
Թուրք-ադրբեջանական ավազակախմբերն առևանգում են հայերին։
Ադրբեջանն ակտիվ նախապատրաստվում է կտրուկ լարել իրավիճակը թե´ Հայաստանի, թե´ Արցախի շուրջ։
Ադրբեջանը շարունակում է զենքի և զինամթերքի զանգվածային գնումներ։
Ադրբեջանը պաշտոնապես հայտարարում է, որ սահմանազատման գործընթացները Հայաստանի հետ պետք է ընթանան համաձայն իրենց ցանկությունների։
Ադրբեջանում պետության ուղիղ հովանու ներքո գործում են կառույցներ, որոնց նպատակն է գեներացնել հանրային տրամադրություններ, համաձայն որոնց, Հայաստանի ամբողջ տարածքը պատկանում է եկվոր թրքալեզու ցեղերին։
Հայաստանի մայրաքաղաք Երևանն ադրբեջանական պետական քարոզչության համաձայն հայտարարվում է «ադրբեջանական քաղաք»։
Հայաստանի ինքիշխան տարածքները մնում են ադրբեջանական օկուպացիայի տակ և ադրբեջանցիները նախապատրաստվում են շարունակել օկուպացիան։
Երևանում մեծ շուքով անցկացվեց գինու փառատոն»։